Hanjakal Kuring Kuliah

Kupas Tuntas Kuliah Jurusan Sistem Informasi

Belajar Menulis Cerita dalam Bahasa Sunda:

Ampir tiap poe kuring hudang subuh pisan. Aya harepan, samemeh adzan Subuh kuring bisa Internetan heula. Eta ge pedah we aya paket Internet murah pisan.

Kuring maca-maca tulisan nu aya di Internet, ti mimiti nu serius nepika guyonan, ti berita nepika tulisan ilmiah. Jenis nu dibaca kumaha purunna we.

Hiji poe, kuring maca tulisan ngeunaan “humaneuarna mahasiswa nu can lulus wae.” Terus aya deui nu nulis “susahna neangan duit.”

Ana ras teh ka diri kuring nu ampir sanasib jeung maranehna. Duit seep, kuliah teu beres. Duh Gusti, gening kieu nasib abdi teh?

Pikiran beuki pabaliut. Hate asa beuki ngarakacak. Ras kana diri nu geus sakieu kolotna. Babaturan nu teu kuliah mah geus deui boga imah jeung keluarga, pagawean oge geus relatif merenah.

Naha jalan hirup pilihan kuring teh salah kitu?

Kuring ngarasa ambek kapegung. Naha bodo-bodo teuing ieu uteuk teh, padahal meh unggal poe teu tingaleun maca.

“Haaaaaaahhh…meureun ieu mah nasib kuring we nu kudu ripuh”, gerentes kuring. Kusabab rada puyeng mikiran hirup, Internet oge ditutup. Sakalian komputer ge dipareuman.

Kuring ka dapur bari niat rek siduru. Sugan we ieu hate bisa kapeper. Gek kuring diuk dina jojodok. Jegur ngahurungkeun hawu.

Seuneu beuki ngalelentab ngahaneutan awak kuring. Tapi bet jadi kainget deui nasib hirup. Kuring kadang-kadang teu ngarti kana kahirupan ieu. Da gening batur nu pagaweanna ulin ka kantin, ka bioskop, jalan-jalan samangsa kuliahna, gening maranehna mah siga leuwih untung hirupna teh. Kuliahna beres, gawena ge merenah.

Naha ieu nu ngaranna gurat takdir teh? “Mun waktu bisa balikan deui, teu hayang teuing cape-cape kuliah, lamun rek ripuh kieu mah. Mending we jualan bala-bala, batur ge gening teu burung bisa hirup”, hate kuring ngagerentes deui.

Kuring mah teu ngarti ah. Nu puguh mah ayeuna ngan bisa ngajalanan hirup we sabrehna, bari kukumpul saeutik-eutik kahadean, bisi kuring tereh paeh. Peuuun.

"Boleh Konsultasi Masuk Jurusan Sistem Informasi via IG atau Tiktok."

Tips Skripsi Program Studi Sistem Informasi